د ننګرهار او میدان وردک ولایتونو د تخنیکي هیئت ناستې جوړې شوې
د ننګرهار او میدان وردک ولایتونو د تخنیکي هیئتونو ناستې ددغو هیئتونو د رئیسانو او غړو په حضور سره جوړې شوې او په یادو ولایتونو کې د ځینو غصب شویو ساحو په برخه کې بحث وشو او لازم تصمیمونه پکې ونیول شوو.
د ننګرهار ولایت د تخنیکي هیئت په ناسته کې د چرخي د ورثې د ملکیت په اړه بحث وشو او د عدليې وزارت لخوا له اړوندو ادارو څخه د معلوماتو د غوښتلو پریکړه وشوه.
دغه راز په دغې ناسته کې، د عدلیې وزارت لخوا د سیاف د فامیلو (دعوت مېنې او شمشاد مېنې) پلورنکي چې په کابل کې هستوګنه لري د جلب او د ننګرهار ولایت تخنیکي هیئت ته د هغوی د معرفي کیدلو پریکړه وشوه.
دغه راز یاد هیئت د مهاجرینو له ریاست څخه د شیخ مصري ښارګوټي په اړه د معلوماتو غوښتلو پریکړه وکړه.
یاد شوي هیئت د قاسم آباد ښارګوټي له غیر شرعي متصرفینو سره وکتل او د ساحې اوسیدونکو ته يې لارښوونه وکړه ترڅو یاده سیمه چې تفصیلي پلان کې شامله ده او د ښاروالۍ لخوا خلکو ته ویشل شوې، ژر تر ژره تخلیه کړي ترڅو د هغو مستحقینو ته وسپارل شي.
په همدې حال کې، د میدان وردک ولایت د تخنیکي هیئت په ناسته کې له استیناف محکمې څخه د هغو رسیدلو شوی دوسیو په اړه چې د محکمې لخوا یې اړوند ځمکې عامه مرعی تثبیت شوې نه وي، پریکړه وشوه چې دوسیې بېرته مستردې شي ترڅو د محکمو لخوا تثبیت شي.
دغه راز یاده ناسته کې، د ولایت د مقام لخوا د هغو رسیدل شویو عریضو پر مسترد کیدو چې عین موضوع په عدلي او قضايي ارګانونو کې جریان کې دي او د ښاري ساحو اړوند نه دي، پریکړه وشوه.
