نیمروز ولایت کې ۷۲۲ جریبه ځمکه امارتي تثبیت شوه
د نیمروز ولایت د ځمکې د غصب د مخنیوي تخنیکي هیئت د یاد ولایت اړوند حاجي جمعه خان کلي ته ولاړ او د دفترونو او دکادستر د نقشو له بررسۍ څخه وروسته، نږدې ۷۷۲ جریبه ځمکه درېو قطعو کې امارتي ثبیت او تفکیک کړه. یاد هیئت اړوند مسوولینو ته د تثبیت شوو قطعو د ساتنې په اړه لارښوونه ورکړه.
له بل لوري د لغمان ولایت تخنیکي هیئت هم د کارونو پر چټکتیا او د لا زیاتې همغږۍ په منظور ددغه ولایت له والي او امنیه قوماندان سره وکتل او د تخنیکي هیئت د لاسته راړونو او ستونزو په اړه یې خبرې وکړې او له دواړو بنسټونو څخه یې له هیئت سره د همکارۍ غوښتنه وکړه.
یاد هیئت د قرغه یي ولسوالۍ په زنګوري سیمه کې د ۱۲۳ جریبه ځمکې په اړه چې تر اجارې لاندې وه او د لوګر کوچیانو لخوا غصب شوې او د غاصبين د هغې د ملکیت ادعا لري، والي او امنیه قوماندان ته معلومات ورکړل.
د لغمان والي د همکارۍ ژمنه وکړه او مسوولینو ته يې لارښوونه وکړه چې ټول ولسوالان دې له یاد هیئت سره همکاري وکړي. امنیه قوماندان هم امنیتي برخه کې د همکارۍ ژمنه وکړه.
پر دې سربېره، د بدخشان ولایت تخنیکي هیئت ددغه ولایت جرم ولسوالۍ ته سفر وکړ او له ولسوال او سیمه ییزو مسوولینو او خلکو سره يې وکتل او د ځمکې د غصب د مخنیوي په اړه یې خبرې وکړې.
یاد هیئت، د جرم ولسوالۍ اړوند د سرحوز دښتې، یباب دښتې، سرجرم دښتې او راغک دښتې د سیمو موضوع چې کابو سلګونه جریبه ځمکه رانغاړي له سیمه ییزو مسوولینو سره مطرح کړه او د ځمکې د غصب د مخنیوي او د یادو سیمو د تثبیت برخه کې دیادې ولسوالۍ له مسولینو څخه د همکارۍ غوښتنه وکړه.
د جرم ولسوال له هیئت سره د همکارۍ ډاډ ورکړ او پریکړه وشوه چې د تخنیکي هیئت د سروې ټیم د یادې سیمې د تثبیت او سروې له پاره جرم ولسوالۍ ته واستول شي.
