ننګرهار ولایت کې زر جریبه ځمکه امارتي تشخیص شوه
د ننګرهار ولایت د ځمکې د غصب د مخنیوي کمېسیون تخنیکي هیئت ددغه ولایت مهمند درې ولسوالۍ ته سفر وکړ او زر جریبه ځمکه یې امارتي تشخیص کړه.
دغه هیئت د یادې ځمکې ۱۰۰ جریبه د اسلامي امارت له اصولو سره سم په اجاره ورکړه. دغې سیمه کې نورې تثبیت شوې ځمکې به ډیر ژر په اجاره ورکړل شي.
په همدې حال کې، د بامیان ولایت د تخنیکي هیئت ناسته ددغه هیئت رییس او غړو په حضور سره جوړه شوه.
په دغې ناسته کې، د بامیان نوین ښارګوټي په اړه بحث وشو او پریکړه وشوه چې د یاد ښارګوټي مالکان وغوښتل شي او له اړوندو ادارو څخه د ښارګوټي سندونو په تړاو له شریعت او د ځمکې د غصب د مخنیوي مقررې سره سم څېړنې وشي. دغه راز د تخنیکي هیئت یوه کمېټه تعیین شوه چې د تخنیکي هیئت د ۶ میاشتو کاري راپور جوړ او راتلونکې غونډه کې وړاندې کړي.
په دغې ناسته کې، د امنیه قوماندانۍ لخوا د اداري اصلاحاتو د آمریت غصب شوو ځمکو په اړه بحث او موضوع د شرعي اجراآتو له پاره د امارت قضایاو ته راجع کړل شوه. دغه راز ددغه هیئت غړو ته لارښوونه وشوه چې د خپلو اجراآتو او ستونزو راپور عدليې ریاست سره شریک کړي.
پر دې سربېره، د لغمان ولایت د تخنیکي هیئت ناسته ددغه هیئت رییس او غړو په حضور سره جوړه شوه
په دغې ناسته کې پریکړه وشوه چې د علینګار ولسوال او ددغې ولسوالۍ امنیه قوماندان د کچور او ابي ناو د شخړې لاندې ځمکې د لا زیاتې بررسۍ له پاره راتلونکې غونډې ته وغوښتل شي.
د ۲R پلان شوې سیمې ښارګوټي په اړه پریکړه وشوه چې ددغې سیمې د غاصبینو نظرونه او غوښتنې واخیستل شي او د نهایي پریکړې له پاره کمېسیون ته واستول شي.
دغه راز یاد هیئت د قرغه يي ولسوالۍ د دره غر او حسین آباد کلیو د ۲۱۶ جریبه کرنیزې ځمکې غاصبینو او د بصرام لېسې له غاصبینو سره وکتل.
د حسین آباد او دره غر غاصبینو وویل چې هغوی ۲۱۶ جرییه ځمکه د څړځای او د هستوګنې سیمې له پاره تصرف کړي او د یادې ځمکې د اجارې غوښتنه یې وکړه. هیئت پریکړه کړه چې هیئت راتلونکې ورځ پر یادې ځمکې حاضر او ځمکه په اجاره ورکړي.
