د عدلیې وزیر د کابل د ځینو خصوصي روغتونونو له مسؤولینو سره وکتل او خبرې یې ورسره وکړې
د اسلامي امارت د عدلیې وزیر، محترم شیخ الحدیث مولوي عبدالحکیم شرعي د ذوالقعدې میاشتې په ۲۵مه نېټه د سېشنبې په ورځ په کابل کې د یو شمېر فعالو خصوصي روغتونونو له مسؤولینو سره په خپل کاري دفتر کې وکتل او له هغوی سره یې د خصوصي روغتونونو د اتحادیې د جوړېدو په اړه خبرې وکړې.
د عدلیې وزیر په دې لیدنه کې د طبابت د مسلک تقدس او د هېوادوالو د ژوند په ژغورلو کې د ډاکټرانو ستر مسؤولیت ته اشاره وکړه او ویې ویل چې ډاکټران باید خپل مسؤولیت ادا او د خپل مسلک تقدس وساتي. نوموړي زیاته کړه چې د خصوصي روغتونونو د اتحادیې جوړېدل کولای شي د خلکو او هم د روغتونونو د ستونزو په هوارولو کې ګټور واوسي.
محترم شیخ الحدیث مولوي عبدالحکیم شرعي څرګنده کړه چې د افغانستان اکثریت وګړي مالي توان نه لري او خصوصي روغتونونه باید د اړمنو ناروغانو په درملنه کې مرسته او همکاري وکړي او له ناروغانو څخه د زیاتو پیسو له اخیستلو ډډه وکړي. هغه مکافات او مجازات یو شرعي اصل وباله او ویې ویل چې اسلامي امارت په دوامداره توګه د ټولو برخو له فعالیتونو نظارت کوي او د سرغړونې په صورت کې له سرغړونکو سره قانوني چلند کوي.
د خصوصي روغتونونو مسؤولینو هم په دې کتنه کې د اتحادیې د جوړېدو د کار د پرمختګ په اړه معلومات وړاندې کړل او ویې ویل چې اوسمهال په کابل کې ۱۲۶ خصوصي روغتونونه فعالیت لري چې د یوې اتحادیې تر چتر لاندې به منسجمې شي. همدا راز هغوی ژمنه وکړه چې د خپلو مسؤولیتونو په ادا کولو کې به لا زیاتې هڅې وکړي.
