د پکتیکا عدلیې رئیس د یاد ولایت له مدافع وکیلانو څخه وغوښتل چې د مدافع وکیلانو له کړنلارې سرغړونه ونهکړي
![.](/sites/default/files/2024-08/pktyka1.jpg)
د پکتیکا ولایت عدلیې ریاست د یاد ولایت له یو شمېر مدافع وکیلانو سره د همغږۍ ناسته جوړه کړه او د پکتيکا عدلیې رئیس پکښې له مدافع وکیلانو څخه وغوښتل چې د خلکو اقتصادي شرایط په پام کې ونیسي او له موکلینو څخه د مدافع وکیلانو په کړنلاره کې له تعیین شوې بیې څخه زیاتې پیسې وانهخلي.
د همغږۍ دا ناسته د صفرالمظفر د میاشتې په ۲۳ نېټه د سهشنبې په ورځ د پکتیکا د عدلیې رئیس، قاري شکرالله احمد په مشرۍ او د یاد ریاست د نورو مسؤولینو او د یاد ولایت مدافع وکیلانو په ګډون سره د عدلیې ریاست په مقر کې جوړه شوه.
د پکتیکا عدلیې رئیس، دفاع وکالت یو سپیڅلی مسلک وباله ویې ویل چې مدافع وکیلان د ظالم پر وړاندې د مظلوم له حق څخه دفاع کوي. نوموړي مدافع وکیلانو ته وویل چې اقتصادي شرایطو ته په کتلو سره، خلکو سره له ترحم څخه کار واخلي او په خپلو کاري چارو کې لازم دقت وکړي.
په دې ناسته کې د پکتیکا ولایت مدافع وکیلانو هم په محکمو او با صلاحیته نظامي ارګانونو کې خپلې کاري ستونزې د عدلیې له رئیس سره شریکې کړې او د هغو د حل غوښتونکي شول.
د عدلیې رئیس وویل چې په د ستونزو د لرې کولو په برخه کې به له اړوندو ارګانونو سره خبرې وکړي او هغو ته د پای ټکی کېږدي.